Munaasabad lagu xusay Maalinta Agoonta Soomaaliyeed oo lagu qabtay Muqdisho

Filed under: Featured,Somali News,Somali News featured |

Munaasabad lagu xusay Maalinta Agoonta Soomaaliyeed oo ku beegan 26 Maarso 1970 kii, sanad guuradii 47 aad ayaana maanta lagu qabtay magaalada Muqdisho.

Munaasabadan waxaa ka qeyb galey Xeer ilaaliyaha guud ee Qaranka Axmed Cali Daahir, Taliyaha Ciidanka Asluubta Soomaaliyeed Sarreeye Guud Bashiir Maxamed Jaamac, ku xiggeenadiisa, Saraakiil kusoo barbaaray Xarumihii Agoonta ee Dowladdii Kacaanka oo ka kala socday  Ciidamada qalabka sida, Ciidanka Asluubta Soomaaliyeed ayaana gacanta ku hayey Xarumhii Agoonta lagu barbarin jiray.

Qaar ka mid ah Dadkii ku soo waxbartay Xarumihii Agoonta hadana qaarkood  oo ay ka mid yihiin Madaxda Dowladda ayaa halkaasi ka sheegay Taariikhda Agoonta Soomaaliyeed iyo sidii loo aas-aasay Xarumihii lagu xanaaneyn jiray.

Taliyaha Ciidanka Asluubta Soomaaliyeed, Sarreeye Guud Bashiir Maxamed Jaamac, ayaa sheegay in Heerka Maanta uu taagan yahay aysan u saarta gali laheyn, haddii aysan jiri laheyn Xarun Agoonta lagu barbaariyo,isagoo xusay in Guddi loo xilsaari doonno Caruurtii Kacaanka si loo mideeyo,lagana qaado lacago la doonayo in wax loogu qabto Caruurta Iminka dalka ku dayacan.

Xeer Ilaaliyaha Guud ee Qaranka Axmed Cali Daahir oo Munaasabadda Gabagabadeeda hadlay ayaa u  hambalyeeyey Dadkii kusoo waxbartay Xarumihii Agoonta ee Dowladdii Kacaanka.

Xaruntii ugu horeysay ee loogu tala galay in Agoonta lagu Xanaaneeyo ayaa waxa ay aheyd Xarunta Agoonta Wiilasha ee Lafoole, 70 Caruur Agoon ah ayaana lagu aas-aasay Xaruntaasi, iyadoo Agaasime uu ka noqday Rashiid Shiikh Cismaan oo dadkii Munaasabadda kasoo qeyb galay ka mid ahaa, Xaruntii labaad ee la dhisana waxa ay noqotay Xarunta Agoonta Gabdhaha ee Dagmadda Afgooye, intaasi kadib Dowladdii Kacaanka ayaana  baahisay Xarumaha sidan oo kale ah iyadoo ka hirgalisay dhammaan Goboladda dalka.

Leave a Reply

Your email address will not be published. Required fields are marked *